“En Xove, MARZO, é o mes da Muller”. Este é o lema que dende a Concellería de Servizos Sociais do Concello de Xove adotamos para poñer en valor á muller.

Neste 2025 quixemos facer un grande esforzo para chegar a toda a poboación feminina, dotando así este mes cunha amplia programación na que haberá, cada semana, varias actividades.

Comezaremos o sábado día 8, cunha andaina que comezará ás 17:00 hs, con saída desde o Centro Cívico do Concello. Posteriormente, ás 18:30 hs xuntarémonos para homenaxear á Asociación de Mulleres “Bolboretas”. Esta asociación foi creada no ano 1990 por un grupo de mulleres que xa detectaron a necesidade de xuntarse para fomentar a participación feminina na sociedade e así crear redes de apoio entre elas.

O venres 14, ás 19:00 hs teremos un faladoiro sobre a “Alimentación nas distintas etapas da Muller”, impartido pola nutricionista Saray Río, fundadora de Nutre tu plato (www.nutretuplato.es)

O xoves 20, ás 11:30 hs, haberá un contacontos teatralizado en igualdade para maiores de 3 anos.

O venres 21, ás 19:00 hs contaremos, con outro faladoiro a cargo de María González, matrona e fundadora do Centro M, no que abordará a temática “Coñece o teu ciclo menstrual” (www.centromburela.com)

O sábado 29, ás 11:00 hs, realizaremos unha sesión de Ioga para mulleres ao aire libre, impartido pola profesora Olalla Martínez.

E como remate, o luns 31, ás 11:00 hs, o alumnado do IES Illa de Sarón, representará unha obra de teatro na que se falará de experiencias de igualdade.

Todas estas actividades serán de balde e terán lugar no salón de actos do Concello.

Calquera persoa interesada en mais información, poderá dirixirse ao departamento municipal de Servizos Sociais.