O alcalde de Barreiros, Alfonso Fuente Parga, e maila voceira do BNG barreirense, Ana Ermida, acusáronse de mentir sobre o servizo de socorrismo do municipio.
A polémica iniciouse tras un comunicado do BNG de Barreiros. Os nacionalistas aludiron a un escrito do Colexio Oficial de Enfermería de Lugo que denunciaba ante o goberno local a suposta avaría dun desfibrilador durante o rescate dunha persoa na praia de Fontela que finalmente faleceu.
O rexedor de Barreiros afirma que “non se produciu o fallo de ningún desfibrilador” e acusa ao grupo municipal do BNG de “contar mentiras”.
O alcalde barreirense considera que a nota do BNG “prexudica ao servizo de socorrismo” do municipio e a veciños e turistas, “porque hai quen pode deixar de vir aquí porque pensa que un desfibrilador non funciona”.
Fuente Parga asegura que o escrito do colexio “non fai nin unha soa mención ao desfibrilador” e “parte dunha premisa errónea”.
O alcalde explica que o texto insta ao goberno local a contratar persoal especializado -un técnico e unha enfermeira– se vai contar cun servizo de ambulancia medicalizada.
“Nós temos unha asistencial e contamos cun técnico e un auxiliar, que é por riba do que levan as do 061, aínda que si contamos cos medios materiais dunha ambulancia avanzada”, indica o rexedor.
Por último, Fuente Parga conclúe que “o desfibrilador funcionou sempre porque ademais leva uns rexistros que pode consultalos calquera”.
“INTRUSISMO”
O BNG de Barreiros sinala que “foron precisamente as mentiras do alcalde as que propiciaron a presentación dunha denuncia formal do colexio de enfermería, por falta de medios humanos e por intrusismo profesional”.
Os nacionalistas acusan a Fuente Parga de “vender servizos falsos” ao falar de “contar cunha ambulancia medicalizada, que é como unha UCI móbil” e de que “ímola ter con dous técnicos sanitarios”.
Ermida asegura que “a persoa que exerceu como auxiliar sanitaria na ambulancia das praias non estivo contratada como tal, senón como persoal de axuda do fogar”.
“A ambulancia só contaba cunha persoa técnica e iso é unha clarísima neglixencia profesional”, conclúe a voceira do BNG.