O portavoz do PSOE no Concello de Riotorto, Pepe García, denunciou un caso de “nepotismo” e acusou ao alcalde, o popular Clemente Iglesias, de “enchufar” á súa muller na casa consistorial.

En concreto trátase dunha praza de auxiliar de administrativo que desde o mes pasado ocupa a esposa do rexedor, un proceso de selección “non foi limpo” e que se situou fóra “de toda ética”. “Se as cousas se fixeran ben habería máis xente interesada na praza (de auxiliar de administrativo). Fixo (o rexedor) as bases pensando na súa señora e tanto é así que só se presentaron a súa muller e outra moza”, queixouse.

O voceiro dos socialistas riotortenses lembrou as “cacicadas” que cometeu o alcalde desde que foi reelixido hai un ano. Entre outras, García xa denunciaba hai algunhas semanas que o salón de plenos non reunía as condicións anti-covid-19 para a celebración de sesións. “As cacicadas son práctica habitual nel. A súa actitude coa oposición é deplorable, en plan chulesco e prepotente. No último pleno tentou expulsarme por preguntas que lle molestan. Ademais a documentación requirida tena aí en silencio administrativo“, dixo finalmente o portavoz socialista en Riotorto.