O Concello de Mondoñedo ten un remanente de tesouraría de 1,4 millóns de euros, trala publicación no Boletín Oficial da Provincia (BOP) da aprobación do expediente de depuración de saldos, ao que non se presentaron alegacións.
Segundo o expediente, os cobros pendentes de aplicación definitiva quedan por debaixo dos 4.000 euros (3.876,45 euros). Os fondos líquidos do Concello ascenden a 2.340.095,42 euros e os dereitos recoñecidos pendentes de cobro suman 1.504.204,53 euros, mentres que as obrigas pendentes de pagamento alcanzan os 666.698,05 euros.
INVESTIMENTOS
A alcaldesa de Mondoñedo, Elena Candia, anunciou que “estamos a estudar cos servizos xurídicos e económicos do Concello a cantidade que se pode destinar para a amortización da débeda, así como a posibilidade de planificar algún investimento no vindeiro exercicio”.
DÉBEDA
A rexedora apunta que “abonado o último recibo do préstamo de pagamento a provedores, quedan pendentes algo máis de 700.000 euros. Esta é a única débeda relacionada co préstamo de pagamento a provedores, coa banca e coas administracións coa que conta actualmente o Concello despois de facer fronte á débeda herdada da anterior lexislatura, que ascendía a 1.437.950 euros”.