O PP de Ribadeo denuncia que os contedores do lixo de varias parroquias do municipio levan quince días sen recoller.

O voceiro dos populares ribadenses, Jesús López Penabad, sinala que “tivemos queixas de veciños porque nas parroquias, polo menos nalgunhas como en Covelas, levan quince días sen recoller o lixo. Como comprenderán, en pleno mes de xullo hai vermes nos contedores e preguntámonos que pasa”, expón.

López Penabad califica a actitude do goberno local de “abandono total” e “pasotismo” e insta ao executivo municipal a solucionar esta situación “por sanidade, por estética, por olor e por todo”.

FOCHANCAS NAS VÍAS MEIRENGOS-RINLO

Os populares critican que algunhas estradas municipais, como as que unen Meirengos con Rinlo, atópanse “nun estado lamentable, pois son auténticas fochancas”.

O voceiro dos conservadores solicita ao goberno local que actúe. “Ofertan 255.000 euros para arranxar pistas, pero por favor, que primeiro tapen as fochancas e fagan as estradas transitables”, demanda.