O Concello de Ribadeo quitou a licitación a mellora de accesos a 20 núcleos rurais do municipio, que suporá un investimento de 255.761 euros, integramente financiado con fondos propios. O alcalde en funcións, Vicente Castro, sinalou que estas obras suporán a primeira fase dun plan que o goberno local publicará nos próximos días e que custeará, cun importe de 251.702 euros, o Plan Único da Deputación de Lugo.

As actuacións consistirán na mellora de accesos con aglomerado nunha vintena de núcleos rurais, que abranguen a ducia de parroquias que hai no municipio. O rexedor en funcións sinalou que a elección dos lugares beneficiados polo proxecto responde a unha decisión “consensuada cos veciños, que nos dixeron as prioridades de actuación en cada unha das fegresías”.

As actuacións enmárcanse nun programa, asegurou Castro, “que iniciamos a finais do 2017 e que vai rematar en marzo do 2019. É unha proposta ambiciosa e con ela contamos darlle unha importante volta tanto aos núcleos rurais do concello de Ribadeo como aos camiños que os comunican entre eles”, explicou. Segundo a previsión do goberno local, ao final do plan teranse investido 725.855 euros, procedentes de fondos propios, do Plan Único da Deputación e do Agader, da Xunta de Galicia”.

PLAN DE REBACHEOS E ASFALTADOS

Castro anunciou que o Concello retomará o plan de rebacheos e asfaltados, que conta cunha partida de 76.000 euros pendentes de executar. Este proxecto, sostén “paralizouse en decembro do 2017 por mor das chuvias e ímolo pór en marcha nesta semana entrante”.