O alcalde de Ribadeo, o nacionalista Fernando Suárez Barcia, enviou unha carta ao novo ministro de Fomento, José Luis Ávalos, para que dote de iluminación á Ponte dos Santos.

O rexedor asegura que a actuación é “necesaria por cuestións de seguridade, de dignidade e de sentido común”, e precisa que se beneficiarían do alumeado “peóns, ciclistas, peregrinos, que cada vez veñen en maior número, e tamén os veciños dunha e doutra banda da ría de Ribadeo”. Suárez Barcia indica que “nin o ancho da beiravía, uns 80 centímetros, nin a disposición das reixas cumpren medida legal algunha”.

“SITUACIÓN CAPRICHOSA”

O alcalde lembra que hai dous municipios, Ribadeo e Castropol, que se beneficiarían dunha actuación “de baixo impacto económico”. O primeiro edil ribadense resalta que os dous concellos, que adoptaron no 2015 acordos unánimes para reclamar o servizo, padecen “unha situación arbitraria e caprichosa por mor dos anteriores responsables do ministerio”.

“Nós non podemos asumir custes de infraestruturas que non son da nosa titularidade, agás que os responsables deleguen expresamente esta competencia e que acompañen esa cesión do correspondente financiamento, cousa que nunca tivo lugar”, sinalou o rexedor ribadense, que entende que hai suficientes argumentos “legais e técnicos” para acometer as actuacións.