O primeiro pleno, de carácter extraordinario, do presente mandato en Viveiro, este mércores ás 20.30 horas, abordará varias cuestións de importancia. O canon de recollida de lixo, Plan Xeral de Ordenación Municipal (PXOM), as faixas de protección contra incendios ou a praia de Covas son algunhas das principais temáticas que protagonizan as mocións das forzas políticas da oposición.
César Iglesias Docal e Victoria Baamonde serán as dúas únicas novidades no equipo de goberno socialista, que mantivo os mesmos concelleiros, oito, que na pasada lexislatura.
A alcaldesa, María Loureiro, presentará unha moción para o recoñecemento do estado de emerxencia climática.
O canon para este ano 2019 da recollida e transporte de residuos sólidos urbáns, así como da limpeza de espazos públicos, é outra das propostas do goberno local; tamén proporá unha subida do 4,3% da tarifa do abastecemento de auga, saneamento e depuración de residuais, reclamada por Viaqua.
PP
O PP de Viveiro presentará no pleno unha formación renovada -con Óscar Rodríguez á fronte- tralas pasadas eleccións municipais. José Soto, Teresa Pérez, Inma Nespereira e Javier Teijeiro, o único que repite, acompañarán a Rodríguez.
O partido conservador levará á sesión plenaria unha moción para instar ao goberno local a limpar a praia de Covas, dado que, asegura que o Partido Popular viveirense, o areal está “cheo de vexetación e lixo”, o que provocou “queixas dos veciños”.
Ademais desta moción, os populares presentan tres preguntas e cinco rogos, das que cabe destacar o arranxo dunha fochanca existente na entrada de garaxes comunitarios na Avenida de Cantarrana, ou sobre a erradicación da praga de vermes no centro urbán.
POR VIVEIRO
Pola súa banda, o partido independente Por Viveiro presentará unha moción para convocar durante a segunda semana de agosto a comisión de seguimento do PXOM, unha xuntanza que deberá ter continuidade cada mes, a fin de que o executivo municipal “aprobe provisionalmente” o documento no 2019.
A formación política que encabeza Bernardo Fraga, respaldado por Manuel Galdo, lembra que a aprobación inicial do documento “fíxose en abril de 2011” e desde entón “moitas alegacións dos veciños seguen sen resposta”. Así, considera que “Viveiro atópase nunha situación urbanística que non pode continuar por máis tempo”, pois “está perdendo o tren do crecemento e da rehabilitación urbana”.
BNG
Pola súa banda, o Bloque Nacionalista Galego (BNG), que volve á corporación trala escisión que se produciu no pasado mandato, presentará unha moción para a elaboración consensuada dun plan económico municipal a desenvolver durante o mandato 2019-2023, e preguntará polas franxas de protección contra os incendios, respecto ás “numerosas queixas recibidas polo estado de abandono de fincas e de plantacións próximas ás vivendas con especies que propagan con facilidade o lume”.
Na parte dos rogos, o BNG, que lidera Miriam Bermúdez, quere dotar de aparcabicis praias, instalacións deportivas e outros espazos públicos axeitados para o uso deste transporte, ou acondicionar a casa do gardamuelles.
SON VIVEIRO
Finalmente, repetirá como líder de Son Viveiro, cun representante obtido nos pasados comicios locais, Luis Manuel García Otero.