Xabier Pardiñas será de novo o candidato de Veciños Independentes de Alfoz (VIA) á alcaldía.

O tenente de alcalde e concelleiro de desenvolvemento local ao longo dos últimos catro anos foi elixido pola dirección executiva do partido, presidida por Efigenia Maseda, por unanimidade.

CRÍTICAS AOS SOCIALISTAS

Desde a dirección executiva de VIA mostrouse crítico co PSOE, partido co que os independentes gobernaron en coalición na lexislatura que está a piques de rematar.

“Na decisión do candidato pesou a eficaz labor realizada durante estes catro anos ao fronte da tenencia de alcaldía do Concello de Alfoz, a pesar das limitacións que tivo polos socios de goberno en forma de falta de cooperación e atribuíndose a paternidade de todo o desenvolvido por VIA”, afirman desde o partido independente.

LISTAXE ELECTORAL

O propio Pardiñas encargarase da confección da listaxe electoral, continuando as negociacións que nas últimas datas se levaron a cabo con diferentes persoas a incluír na candidatura.

O candidato de VIA afirma que se presenta “con moita ilusión e consciente da responsabilidade do encargo que me confían os meus compañeiros”. Respecto á candidatura indica que se confeccionará unha lista “con xente comprometida, ilusionada e preparada para gobernar”.

ELECCIÓNS EUROPEAS

Así mesmo, a Dirección Executiva de VIA Alfoz aprobou a presentación dunha candidatura ás eleccións europeas, probablemente en coalición con outros partidos.