O presidente da Xunta, Alfonso Rueda, reprochou á portavoz nacional do BNG, Ana Pontón, que “criminalizase” e “vilipendiase” ao exconselleiro do Mar, Alfonso Villares, que foi investigado nun procedemento por suposta agresión sexual que foi arquivado.

No inicio da súa quenda de réplica á pregunta da líder da oposición na sesión de control na Cámara, Rueda arrincou lembrando a Pontón o seu “respecto enorme a persoas que están en procedementos xudiciais”, en referencia a unhas palabras da portavoz nacionalista sobre as causas contra a muller do presidente do Goberno, Begoña Gómez.

“Está a falar de Alfonso Villares? Non, a Alfonso Villares vostede criminalizouno desde o principio, vilipendiouno e humillouno, fixo de xuíza, de fiscal, esmagouno”, censurou Rueda, que insistiu en reprochar a Pontón o seu “sectarismo, soberbia e covardía”.

Na súa seguinte quenda, Pontón, que cuestionara ao presidente do Goberno galego polo plan de control das baixas laborais anunciado pola Xunta, emprazou a Rueda a falar do seu “lamentable comportamento” no caso Villares “cando queira, onde queira e á hora que queira”.

En todo caso, subliñou que “nada vai evitar” que responda o Parlamento sobre “a inmoralidade de perseguir aos traballadores por estar enfermos”.

Con todo, na contrarréplica, Rueda volveu a insistir en que a líder do Bloque utilizou “catro sesións de control” para falar do exconselleiro do Mar, afeando a Pontón que “agora o ventila dicindo que ‘cando queira e onde queira'”. “Vaia covardía e vaia inxustiza”, salientou.