O Partido Popular e Por Viveiro volverán reunirse este mércores 18 de febreiro co obxectivo de selar unha alianza das dúas forzas e presentar unha moción de censura para facerse co goberno da localidade vivairense. A reunión está prevista para as 20.00 horas e servirá para pór sobre a mesa as follas de ruta de ambos os partidos e ver a viabilidade dun futuro acordo de goberno.

A primeira reunión celebrouse hai unha semana e foi cualificada por ambos os como “moi intensa e frutífera”, na que expuxeron as “necesidades de Viveiro” e a priorización das mesmas, centrándose nas liñas programáticas. Despois dunha semana de debates e preparación, esta segunda reunión será definitiva para chegar a un acordo, xa que presentarán un documento de compromiso entre ambas as formacións, no que hai achegas de ambos.

A variante, a PXOM ou recuperar o mobiliario das distintas áreas como deportes e cultura son algúns dos temas nos que achegaron posturas, así como a intención de implicar nestes dous anos que quedarían de Goberno a todas as administracións. Nesta segunda reunión tamén se debaterán outros temas do acordo entre ambas as formacións, como a composición do futuro Goberno.

A unión dos sete concelleiros populares e os dous de Por Viveiro sumarán unha maioría absoluta que supera ao actual Goberno, formado por 5 concelleiros do PSOE e 3 de BNG, que en coalición preside a socialista María Loureiro. Por Viveiro apoiou, ao acabar as últimas eleccións, á coalición de esquerdas, pero hai uns días anunciou a ruptura co equipo de Goberno, sobre o que dixo que “estaba desgastado, sen liderado, nin peso político”. Alegou Bernardo Fraga naquel momento que non se cumpriron as demandas que asinaron para apoiar a investidura de Loureiro. Se se chega a un acordo, ambas as formacións presentarán unha moción de censura, que derivará na convocatoria dun pleno extraordinario nun prazo máximo de dez días.