O Concello de Trabada continúa anunciando novas actuacións de mellora nas estradas municipais. Neste caso, os traballos desenvolveranse na parroquia de Sante, coa execución dunha primeira fase de actuación nos accesos ao núcleo da igrexa.

O proxecto, cun investimento de máis de 44.000 euros, permitirá actuar en tres accesos que comunican co núcleo da igrexa, mellorando o estado das vías e a seguridade da circulación.

As actuacións previstas inclúen a limpeza previa de cunetas, o aglomerado en quente, o pintado completo das vías e a instalación de nova sinalización vertical.

En concreto, actuarase nos seguintes tramos:

Do Teleclub de Sante ata o cruce da panadería

Desde Penaquente ata O Prado

Desde a igrexa ata o Rego de Louro

O alcalde de Trabada, Rubén García, destacou que “continuamos avanzando na mellora das nosas estradas municipais, executando proxectos que permitan renovar infraestruturas importantes para o día a día da veciñanza”.

Así mesmo, sinalou que “seguimos traballando para levar actuacións ás distintas parroquias do concello, mellorando as comunicacións e os servizos municipais”.