As asociación de Axuda ao Enfermo Mental A Mariña conmemorará o Día Mundial da Saúde Mental, que se celebrará o 10 de outubro, con varias actividades.

Nesta edición, a celebración porá o foco sobre a mocidade, dado que a adolescencia é unha etapa na que as persoas son especialmente vulnerables ás enfermidades mentais. Calcúlase que entre o 10 e o 20% dos nenos e adolescentes manifestan algún tipo de doenza mental.

Así, co propósito de concienciar sobre esta realidade, integrantes do colectivo achegaranse aos centros de saúde da comarca para asesorar -a través de xogos e outras actividades dinámicas- sobre condutas favorables e desfavorables para previr ou axudar a combater as enfermidades mentais.

DATAS E LUGARES

O martes 2, a asociación estará no centro de saúde de Cervo; o mércores 3, en Ribadeo; o xoves 4, en San Cibrao e o venres 5, en Burela.

REVISTA ‘AGARIMO’

Ademais, a agrupación celebrará o día 10 un acto conmemorativo na unidade residencial da Bidueira, en Cervo, no que presentará un novo número da revista anual Agarimo, elaborada polos usuarios.