A Consellería do Mar ten previsto acometer obras de mellora do pavimento no muelle de Mirasol, no municipio de Ribadeo. Así o asegurou o presidente da entidade autonómica Portos de Galicia, José Juan Durán, nunha visita ao peirao ribadense.

O Goberno galego pretende mellorar a seguridade vial no acceso e extensión do muelle, onde hai fochancas polo impacto do tránsito pesado. Durán afirmou que o organismo portuario pavimentará o firme tanto na zona de entrada ao peirao, o treito previo ás barreiras de seguridade, como ao longo da parte de carga e descarga de mercancías, maioritariamente celulosa.

Primeiro acometerase o fresado da capa de base, para despois proceder ao afirmado cunha cobertura de mestura en quente. O representante de Portos de Galicia explicou que, para realizar esta obra, será necesario desmontar as barreiras de acceso ao código PBIP -de seguridade internacional dos peiraos comerciais- e levantar os rexistros de saneamento até a nova cuota de rasante.

Os traballos, segundo a previsión do ente autonómico, comezarán no vindeiro mes de xuño, unha época que coincide cun decrecemento na intensidade do traballo no porto, especialmente na extensión de carga e descarga de mercancías. Portos de Galicia vai investir na obra un total de 60.000 euros.