Unha vivenda de Ribadeo sufriu un incendio que se orixinou posiblemente nunha manta eléctrica. Neste caso non houbo persoas feridas nin afectadas.

Segundo expuxo o 112, os Bombeiros de Barreiros explicaron que a causa do incendio foi unha manta eléctrica que calcinou por completo o salón, mentres que o resto da vivenda quedou afectado polo fume.

Un particular avisou arredor das 11.40 de que vía lume saír de dúas fiestras dun piso situado num edificio de seis plantas fronte á Praza de Abastos de Ribadeo, fronte ao Hotel Bouza. Non foi o único, xa que outros alertantes indicaron que as persianas da vivenda estaban queimadas.

Ata o punto desprazáronse os Bombeiros de Barreiros, a Garda Civil e a Policía Local. Ademais, informouse dos feitos ao Servizo de Urxencias Sanitarias de Galicia-061, por se fose necesaria a súa intervención, así como aos Bombeiros de Viveiro, ao persoal provincial de incendios e aos efectivos da Agrupación de Voluntarios de Protección Civil da localidade.

Finalmente, unha vez no lugar, os Bombeiros comunicaron que extinguiran o lume, que puido orixinarse noutra manta eléctrica situada no salón. A estancia quedou calcinada e o resto do piso resultou afectado polo fume.