-Ribadeo contará cun parque de 300 vivendas públicas de nova construción. Que pasos se deron para levar adiante este proxecto?

Os primeiros pasos déronse coa aprobación no Consello da Xunta para a súa construción, por certo, o único concello de máis de 10.000 habitantes que vai ter 300 vivendas. Isto é froito dunha proposta e dunha iniciativa por parte do Concello de Ribadeo, para termos vivenda protexida. O segundo paso foi encontrar e aportar o terreo para que a Xunta declare o PIA (Plan de Interese Autonómico) e cando isto ocorra, haberá un proceso de expropiación que dirixe e tutela -en colaboración co Concello- a Xunta. A partir de aí negociarase cos e coas diferentes propietarias. Unha vez licitado o PIA, redactarase o proxecto coa delimitación das parcelas. Nese sentido podemos dicir que as cuestións legais van adiantadas.

-Van ser vivendas novas ou vai haber algunha proposta de rehabilitación?

Todas serán vivendas novas. A proposta municipal é ‘baixo+2’, por tanto a altura será acorde coa contorna. Son vivendas que queremos en Ribadeo, un urbanismo harmónico porque somos conscientes diso. Serán 300 vivendas novas, un número importante e baseado na demanda que reclama a poboación en Ribadeo.

-Por que ese número, 300 vivendas?

É o número calculado en base á solicitude de vivendas. Isto faise en base á petición que ten a Xunta de Galicia sobre solicitudes de vivendas. Por tanto, en base ao número de solicitudes que tiñamos en Ribadeo concretamos esta cifra. A construción realizaríase no Vilar, xunto á Avenida Ría de Ribadeo, nesa contorna. Emprazámolo aí porque queremos ampliar Ribadeo, facelo máis grande, mellor distribuído e non pensar en focalizar todo nun único punto dentro da vila. Isto faise tendo unha visión dun Ribadeo para o 2030, entendemos que deberiamos construír nunha zona pensando no futuro. Hai outras zonas onde se construirá como Vilaselán e Ove, neste último caso xa se van levantar vivendas até o cemiterio, cousa que xa se aprobou en pleno.

-Cre que esta iniciativa de vivenda pública pode facer aumentar o número de persoas censadas en Ribadeo?

Eu creo que si, por iso estamos crecendo paulatinamente en censo de habitantes.

-Dentro dese desenvolvemento urbano harmónico está a capela da Virxe do Camiño. Cales son as propostas para este espazo?

Crearemos unha sala cultural. Esta foi unha proposta moi razonada e moi razonable que nós comezamos a traballar sabendo que a titularidade corresponde ao bispado de Mondoñedo de aí falar primeiro con eles para a cesión de uso. Isto levouse a pleno e agora toca xestionar o orzamento necesario para a súa rehabilitación. Creo que en poucas semanas poderemos anunciar esa colaboración para rehabilitar a capela mais que aínda está por concretar. Ter unha sala cultural é algo que agora mesmo fai falta en Ribadeo debido á ausencia de conservación durante os últimos anos en espazos culturais.

-Non existían infraestruturas até o momento?

Temos un auditorio onde non se fixo ningún investimento durante anos, un cinema-teatro que non se soubo xestionar durante o anterior goberno, pagábase luz e auga, facendo mantemento e, a maiores, un aluguer. Agora mesmo o Concello ten a cesión de uso, por tanto non pagamos aluguer, mais temos vocación de xestionar un orzamento para a súa rehabilitación. Por tanto, debemos ser conscientes que o cinema-teatro estará en rehabilitación, por iso debemos ter dous puntos culturais: un o auditorio e outro a capela da Virxe do Camiño, un espazo idóneo, accesible e dunhas dimensións razonables para actos diversos de promoción cultural.