Ribadeo investiu 50.000 euros, procedentes da Xunta, na mellora dunha estrada na Siñeira, en Vilaframil.

O alcalde, Dani Vega, explicou que “seguimos xestionando orzamento para mellorar as nosas vías de comunicación. Neste caso, actuamos en Vilaframil, no barrio da Siñeira. Estamos mellorando toda esta infraestrutura. Hai unha limpeza previa, despois obras de fábrica, firmado de pavimento, nova sinalización e hai que destacar que estamos incrementando os anchos. Pasamos de 3,80 a 4,20 metros e nesta estrada hai puntos que teñen 5,10”.

O rexedor considera que “é unha mellora significativa, 100 % financiada pola Xunta, preto de 50.000 euros, que ten unha lonxitude de 400 metros e seguimos xestionando orzamento para mellorar todas as vías de comunicación. Hai que recordar que este ano vanse investir 1,4 millóns de euros no total das nosas infraestruturas”.