O BNG de Ribadeo enviou un comunicado onde denuncian a ausencia de varios especialistas dentro do centro de saúde. Así mesmo, critican ao alcalde ribadense, Daniel Vega, de non defender os intereses de Ribadeo neste aspecto. “Por moito que Daniel Vega prometa e volva prometer que el non cala ante a Xunta de Galicia cando se trata de defender Ribadeo, o paso do tempo confirma que desde San Caetano non lle fan caso ningún e seguen sen cubrir esas baixas ou prazas vacantes”.

Os nacionalistas engaden ademais que “pouco a pouco vaise confirmando o plan oculto do PP de ir reducindo a sanidade pública á súa mínima expresión dando negocio á sanidade privada”. Segundo o BNG ribadense, esta última “cada vez recibe máis doentes do Sergas porque, ao reducir o persoal, as listas de agarda aumentan sen parar”.

Desde o BNG de Ribadeo queren insistir na necesidade de cubrir as prazas vacantes ou baixas. Tanto Pablo Vizoso, desde Ribadeo, como Daniel Castro, no Parlamento de Galicia, volverán demandar que se dote xa do persoal sanitario necesario o centro de saúde de Ribadeo.