Do 3 ao 15 de setembro estará aberto o prazo de inscrición no programa Preto de Ti do Concello de Ribadeo.

A concelleira de Benestar Social, Elena Sierra, explicou que “estamos de volta co programa Preto de Ti. Dentro duns días retomaremos os talleres memoria, a ximnasia, as manualidades e o taller sobre o uso do teléfono móbil”.

A edil ribadense dixo que “a inscrición para participar nas actividades de Preto de Ti estará aberta do 3 ao 15 de setembro. As persoas interesadas deben anotarse chamando a María, a responsable deste programa, ao 625 104 274 en horario de nove da mañá a tres da tarde”.

Sierra subliñou que “ademais esta tempada como novidade imos ter charlas sobre saúde, que serán impartidas pola enfermeira dos nosos Servizos Sociais. Nesas charlas abordaremos cuestións como as curas, os hábitos saudables ou a nutrición, por poñer uns cuantos exemplos”.

A concelleira de Benestar Social anima “ás veciñas e aos veciños de Ribadeo a participar e a sumarse ao programa Preto de Ti, co que pretendemos seguir dinamizando as nosas parroquias, queremos que gocen de actividades durante todo o curso e que, ademais de aprender, pasemos un bo intre entre amigos”.