O novo reitor da Universidade de Compostela (USC) é de Barreiros. O catedrático de Dereito Financieiro Antonio López obtivo máis do 60% dos votos ponderados -a falta do reconto en dúas mesas- e superou nas eleccións ao reitorado ao actual responsable da institución académica, Juan Viaño.
O seu nomeamento provisional será o 26 de abril. Desde o día 27 ao 2 de maio haberá un prazo para presentar recursos ante o comisión electoral e a súa proclamación definitiva será o 7 dese mes.
López presentara a súa candidatura a reitor no 2014. Daquela perdeu fronte a Viaño por unha lixeira diferenza. O barreirense propuxo este ano “un cambio de rumbo” e fixo fincapé durante a campaña na contratación e estabilización do profesorado, nas melloras laborais e na apertura de portas ao alumnado estranxeiro.
gañou Nos catro sectores chamados ao voto: doutores, alumnado, persoal docente e investigador e pas
O novo reitor da USC subliñou como prioridades elaborar un plan de persoal para a recuperación do emprego e dos dereitos dos docentes e Persoal de Administración e Servizos (PAS). Aínda que, sinala, “non será dun día para outro” e farase “con responsabilidade, pensando sempre no mellor para a universidade”.
ESCASA PARTICIPACIÓN
O barreirense agradeceu “un respaldo moi importante, que nos dá moita forza para seguir adiante”. As eleccións na USC celébranse con voto ponderado, de xeito que o sufraxio dos profesores doutores supón o 51% do total; o dos estudantes, o 28%; o dos integrantes doutras categorías de persoal docente e investigador, o 11%; e o de PAS un 10%. López impúxose nos catro sectores, con especial diferenza ao seu favor entre o alumnado. Con todo, a participación foi escasa, pois só exerceu o seu voto o 27% das máis de 27.000 persoas convocadas ás urnas.
López (Barreiros, 1964) obtivo a licenciatura de Dereito, con premio extraordinario, no 1986. Entre 2005 e 2007 foi decano da Facultade de Dereito de Santiago de Compostela. En xullo dese mesmo ano, o Parlamento Galego elixiuno membro do Consello de Contas, cargo que ostentou ata 2013. Entre 2007 e 2010 foi conselleiro maior deste organismo.