A científica barreirense Aurora Sampedro acaba de ser nomeada filla adoptiva do Concello de Luyego de Somoza (León) por ser a terra de nacemento do seu pai, Francisco Sampedro Fuente.

Manuel Rivero, autor do libro Universo Aurora e estudoso desta científica e divulgadora barreirense conta tamén que “a cátedra de Muller e Ciencia da Universidade Pública de Navarra considera a Aurora Sampedro como unha das científicas máis importantes da segunda metade do século XX, algo que nos enche de ledicia” e adianta que “no vindeiro mes de outubro estará publicado o terceiro libro sobre Aurora, titulado Ciencia con nombre de mujer: el legado de Aurora Sampedro”.

E xa se coñecen tamén os nominados para a entrega dos premios Bítere de Honra 2026, que recibirán o escritor, poeta e profesor da Universidade de Vigo Martinho Montero Santalha; o de In Memoriam será para a poeta María das Dores Arribe Dopico; e o institucional para o Concello leonés de Luyego.