A Audiencia Provincial de Lugo desestimou o recurso e, en consecuencia, confirma a decisión do Xulgado de Instrución número 2 de Mondoñedo de decretar o sobresemento provisional e arquivo da causa aberta contra o expresidente da Deputación Darío Campos por suposta prevaricación administrativa no seu cargo de alcalde da Pontenova.

En concreto, a causa centrábase na denegación dunha licenza de obras na localidade vinculada co trazado de sanemento en Conforto.

O auto da Audiencia, con data de 22 de abril, subliña que neste caso “non está debidamente acreditado o propio feito que se denuncia” e incide en que non toda irregularidade, de existir, desemboca nunha infracción penal.

De feito, remarca que as cuestións e a denegación da licenza que deu pé á denuncia “haberán de liquidarse” no seu ámbito “natural, que é o administrativo”, sen que poida “extrapolarse a súa análise ao dereito penal” Así as cousas, acorda desestimar o recurso presentado e ratifica a decisión adoptada no xulgado de Mondoñedo.