Ante as queixas xurdidas novamente na vivenda comunitaria de A Pontenova polo servizo de comida por unha empresa de cátering, o concelleiro do BNG Xorxe Gómez e o deputado Daniel Castro reuníronse cos usuarios e usuarias da vivenda comunitaria pertencente ao Consorcio Galego de Igualdade e Servizos Sociais que depende da Xunta de Galicia. As usuarias e usuarios manifestaron o seu malestar polo novo empeoramento da comida. O servizo de cátering mellorara despois da visita á vivenda do director do Consorcio, aínda que en días posteriores á mesma mellorara a calidade das comidas pero a día de hoxe volveu a empeorar.

O BNG no seu día, e fruto doutra reunión con usuarios levara a problemática ao Parlamento e desde a Conselleria de Presidencia respondérase que a empresa de cátering cumpría o seu contrato dando un servizo que se axustaba aos estándares de calidade establecidos.

Que a comida se faga na Pontenova e con produtos de proximidade

Ante esta nova situación, o BNG volverá a preguntar no Parlamento pola situación e trasladará a reivindicación dos usuarios de que a comida se elabore na propia cociña da que dispón a vivenda comunitaria, que está sen estrenar e está dotada de todos os aparatos necesarios e modernos, coma forno industrial, neveiras….. “A alimentación é un servizo esencial cando falamos de calidade de vida e o benestar de persoas usuarias de centros sociais polo que a responsabilidade da administración pública, neste caso da Xunta, é a de fornecer alimentos de máxima calidade e co máis alto valor nutricional” manifestou o deputado Daniel Castro, que insistíu na necesidade de que a comida se faga na propia vivenda comunitaria de A Pontenova, e con produtos de proximidade, e desbotando a figura do cátering.