A Xunta licitou por preto de 7,5 millóns de euros a obra de mellora do abastecemento de auga a Ribadeo e Trabada, co que se beneficiará a unha poboación potencial de preto de 10.000 habitantes dos dous municipios lucenses.

As empresas interesadas en optar a este contrato teñen de prazo ata o día 11 de novembro para presentar as súas ofertas e o prazo de execución previsto é de 15 meses.

O obxectivo desta actuación é corrixir a deterioración da rede de abastecemento existente, construída hai 40 anos, así como as avarías e roturas que sofre e que impiden que se poida garantir a cobertura da demanda de auga actual.

A execución dunha nova rede de abastecemento atravesará ambos os concellos e mellorará a subministración de auga potable na zona, sobre todo no caso de Ribadeo.

A achega da Xunta, a través de Augas de Galicia, será do 80% –con cofinanciamento da UE a través do Fondo Europeo de Desenvolvemento Rexional (Feder) 2021-2027– mentres o Concello de Ribadeo asumirá o 20% restante. Trabada porá á disposición os terreos necesarios para a execución das obras.

A licitación terá como actuación principal a execución dunha nova condución de 15 quilómetros entre o depósito de Vilarbetote (en Trabada) e o depósito de Loureiro (Ribadeo), a cal discorrerá en paralelo á tubaxe xa existente.