O Concello de Xove e Alcoa celebraron este xoves unha xornada de seguridade conxunta para dar divulgación ao actual Plan de Emerxencia Exterior (PEE) do Depósito de Barros Vermellos. O encontro estivo liderado polo alcalde, Demetrio Salgueiro.
Por parte do Servizo de Emerxencias, participou Mario Antuña, quen compartiu coas veciñas e veciños as pautas que hai que seguir en caso de activación do Plan. Antuña explicou as fases do procedemento, establecido en prealerta, alerta e evacuación, e lembrou a importancia de prestar atención á información proporcionada só en fontes oficiais.
Por parte de Alcoa, Raquel Vázquez, directora da planta de Alúmina, explicou as cuestións técnicas da instalación e o proxecto de recrecido para a cota 110 que se está tramitando para o depósito. Actualmente a compañía está a levar a cabo os traballos para elevar a cota de 100 a 104 metros.
A sesión xurdiu froito dunha primeira reunión o pasado novembro con veciños de Morás, a parroquia máis próxima á instalación, onde Alcoa e o Concello puideron recoller un alto interese por comprender mellor o Plan de Emerxencia Exterior en vigor.