A Conselleira do Medio Rural, María José Gómez, desprazouse este pasado sábado ao concello de Xove para visitar, acompañada do alcalde Demetrio Salgueiro, a única explotación de porco celta existente neste municipio. Trátase da explotación Casa Labradela, situada na parroquia de A Rigueira, e xestionada polos irmáns José Ángel e Shaila García.

Casa Labradela leva 4 anos apostando pola cría de porco celta en réxime extensivo, unha actividade que compatibilizan tamén coa explotación apícola, bovina e cabalar, mantendo así un modelo de produción diversificado e vencellado ao territorio.

Durante a visita, a conselleira interesouse pola xestión da explotación en extensivo e polo papel que este tipo de iniciativas desempeñan na recuperación e posta en valor do porco celta, unha raza autóctona galega en perigo de extinción. Así mesmo puxo en valor o compromiso dos gandeiros coa conservación da biodiversidade e co desenvolvemento do medio rural.

María José Gómez tamén coñeceu de primeira man o proceso de produción do mel que comercializan os irmáns García baixo a marca Casa Labradela, destacando a importancia da apicultura como actividade complementaria e sustentable, así como a aposta pola comercialización de produtos de calidade ligados ao territorio.

Esta visita enmárcase no apoio da Consellería do Medio Rural ás explotacións familiares que contribúen á conservación das razas autóctonas e ao fortalecemento do rural galego.