A Consellería do Mar, a través de Portos de Galicia, traballa na finalización do proxecto construtivo do dique de abrigo do porto de Morás, en Xove, que en 2025 contará cunha partida orzamentaria específica. Así o detallou este sábado o conselleiro do Mar, Alfonso Villares, durante a súa visita á localidade onde ratificou o compromiso da Xunta con esta infraestrutura que dará resposta a unha demanda histórica do sector.

Villares informou de que Portos de Galicia recibiu, despois de anos de tramitación administrativa, o informe inicial de adscrición dos terreos do Estado á Xunta. O documento, explicou a Xunta nun comunicado, permite ao Executivo autonómico iniciar a tramitación necesaria para incorporar a titularidade dos terreos á Administración autonómica e desbloquear finalmente o proxecto de construción do dique, cuxo estudo de alternativas data de 2006. Tras recibir o informe, o conselleiro do Mar incidiu no compromiso da Xunta con esta actuación que, asegurou, contará con partida orzamentaria específica de Portos de Galicia para 2025.