A Garda Civil investiga a dúas persoas que foron identificadas cando extraían de forma ilegal percebes nunha zona de rocas de Xove. Segundo informou este mércores o Instituto Armado nun comunicado, os axentes do Seprona interviñeron un total de 30 quilos de percebes que foron doados a un centro benéfico da Mariña.

Os dous investigados por marisqueo ilegal atopábanse extraendo percebe nunha zona rochosa entre os illotes de Os Netos e o faro de Roncadoira. Cando foron sorprendidos, levaban traxes de neopreno, dous sacos de rede amarrados á cintura, dúas ‘panferras’ (útiles usados polos percebeiros para arrincar o crustáceo da roca) e un cabo. As dilixencias policiais foron remitidas ao Xulgado de Garda de Viveiro.