A conselleira de Medio Rural, María José Gómez, asistiu este venres ao Mercado de Verán que se celebra este fin de semana en Viveiro. Alí, reivindicou a aposta do Goberno autonómico por achegar á cidadanía a calidade diferenciada da produción agroalimentaria galega, levándoa directamente aos lugares nos que se atopan as persoas consumidoras.

Neste sentido, explicou que o obxectivo desta iniciativa é configurar estes mercados como unha experiencia que ofreza a oportunidade de coñecer e degustar estas elaboracións, á vez que a cidadanía aprende a identificar os produtos co territorio no que se orixinan que, asegurou, fainos singulares.

Ademais, incidiu en que estes espazos contribúen a favorecer unha relación directa entre produción e consumo. Segundo explicou, a presenza das persoas operadoras dálles a oportunidade de presentar os produtos, explicando a súa elaboración e as características que os fan únicos.

Gómez destacou que este tipo de iniciativas buscan tamén pór en valor os diferentes indicativos de calidade existentes en Galicia, conformados por un total de 36 denominacións de orixe e indicacións xeográficas protexidas, aos que se engaden o distintivo de produción ecolóxica e o selo de Artesanía Alimentaria.

Ao mesmo tempo, recoñécese o bo facer das persoas produtoras, radicadas maioritariamente en contornas rurais, “que co seu labor contribúen a manter a actividade económica, a fixar poboación e a crear oportunidades de emprego nestas zonas”.