Os sindicatos CIG e STEG convocaron un peche no CEIP Plurilingüe de Covas. Despois de que no primeiro trimestre as organizacións convocantes das mobilizacións que se estenderán polo territorio galego nunha estratexia de descentralizar o conflito até o máximo nos centros de ensino. Segundo os convocantes: “os centros convértense en espazo de confluencia entre toda a comunidade educativa e de posta en común das necesidades converxentes de profesorado e alumnado”.

O obxectivo desta medida é chamar a atención ante “o desprezo da Consellaría que segue sen atender a voz maioritaria do profesorado galego, representada polas dúas organizacións sindicais que lideran as mobilizacións desde comezos de curso”. O obxectivo tamén é visibilizar os problemas que afrontan ás familias e ao alumnado, “porque cando estamos falando de que non hai profesorado de Pedagoxía Terapéutica, Audición e Linguaxe ou persoal orientador suficiente estamos evidenciando a gran carencia nestes momentos no sistema educativo galego que obriga aos centros a decidir que alumnado se atende e cal non”.

Os convocantes denuncian que cando non se cumpren “nin as raquíticas medidas incluídas no acordo de melloras, ampliando as ratios por riba do permitido ou agrupando varios niveis por riba do incluído tamén no acordo de agrupamentos, o que sae perdendo é alumnado máis vulnerábel, a igualdade de oportunidades e unha sociedade máis xusta”.

Este tema, xunto coa redución de ratios, a eliminación da burocracia e a aposta pola oferta pública en todas as etapas educativas “son os puntos en común que se están a abordar coa representación das familias e do alumnado”.

Á hora de entrada deste venres está previsto que os convocantes do peche asistan á concentración de pais e nais de alumnos ‘Venres Negros’ .