Mariña Gueimunde, alcaldesa de Viveiro, mantivo un encontro institucional con Alfonso Rueda, presidente da Xunta de Galicia, no que se analizaron asuntos estratéxicos para o presente e o futuro do Concello.

Na reunión abordáronse cuestións relativas ás infraestruturas viarias, ás necesidades de vivenda e ás melloras nos sistemas de abastecemento e saneamento de auga. O obxectivo é dar resposta ás demandas actuais e planificar solucións a medio e longo prazo.

Na xuntanza tamén se trataron cuestións relacionadas co Paseo Marítimo de fachada, como a recuperación e humanización do peirao vello, considerado un espazo estratéxico tanto pola súa función de aparcamento como pola súa proxección cara ao mar.

Ambas institucións coincidiron na importancia de establecer unha folla de ruta conxunta que permita avanzar nestas materias. A alcaldesa trasladou ao presidente as prioridades de Viveiro e salientou a relevancia de manter este diálogo institucional para asegurar que as necesidades da veciñanza estean presentes na planificación da Xunta.