A Plataforma pola Sanidade Pública da Mariña convocou unha concentración diante do Centro de Saúde de Viveiro. Esta é a primeira manifestación organizada no mes de setembro demandando un cadro de persoal completo, estable e durante toda a quenda.

Nesta ocasión o encargado de abrir o acto reivindicativo foi Samuel Fernández Bouza, veciño de Viveiro que fai parte do tecido asociativo veciñal da cidade e tamén integrante deste colectivo sanitario. Comezou agradecendo a presencia a todas as persoas que asisten habitualmente, mais tamén a aquelas que non poden vir por diversos motivos ou a aquelas que presentan reclamacións ou de xeito valente denuncia públicamente nos medios a situación sanitaria da comarca.

Explicou que durante todo este tempo, desde o mes de maio concretamente, “o pobo de Viveiro sigue a pé de rúa denunciando a situación que existe no centro de saúde e solicitando respostas e solucións por parte de quen xestiona a sanidade pública galega e a Área Sanitaria”.

Samuel deu paso a dúas mulleres que resaltaron como a xerencia “fixo oídos xordos diante das advertencias da veciñanza do caos que se aveciñaba, máxime durante o período estival, datas nas que Viveiro pode chegar aos cincuenta mil habitantes”. Denuncian un cadro de persoal médico ao 50 por cen, “sen persoal para as persoas desplazadas e con persoal de enfermería non subtituído por vacacións”.

Denunciaron que “a única “solución” da xerencia e da consellería foi reunirse con alcaldes e alcaldesas do PP para decir que a atención sanitaria estaba garantida na Mariña” e que “ían priorizar a cobertura dos centros sanitarios da Mariña, outra mentira máis que engadir ao ranking de mentiras do PP”.

Samuel Fernández concluiu o acto sinalando o comportamento do goberno actual de Viveiro e da súa alcaldesa que “correu para chegar primeira á chamada do xerente máis nin unha soa vez acudiu a acompañar ao seu pobo para defender a atención sanitaria en Viveiro”.