A exconcelleira de Cultura e Igualdade de Viveiro (Lugo), Lara Fernández-Noriega, e a súa parella está investigados por un delito de violencia doméstica e un delito de violencia de xénero con resultado de lesións, segundo confirmaron fontes xudiciais.

Ambos foron detidos pola Policía Nacional fai un par de semanas, tras protagonizar unha pelexa nun local de lecer nocturno que rexentan en Viveiro. O pasado 1 de abril pasaron a disposición do xulgado de instrución número 2 de Viveiro, en funcións de garda, que acordou a súa posta en liberdade sen medidas. Ambos están investigados, nun caso por un delito de violencia doméstica e, no outro, por violencia de xénero, con resultado de lesións.

As mesmas fontes xudiciais ratificaron que os dous se denunciaron mutuamente, polo que ambos teñen a condición de denunciante e investigado/a. Lara Fernández-Noriega foi responsable de Cultura e Igualdade no anterior goberno municipal de Viveiro, dirixido por María Loureiro, ata que unha moción de censura outorgou a alcaldía ao PP. Desde entón, Fernández-Noriega permanece na corporación como edila do grupo socialista, na oposición.

O PSdeG trasladou nas últimas horas a súa “máis firme condena” a calquera forma de violencia, “especialmente á violencia de xénero e á violencia no ámbito doméstico”, e sinalou que debe ser a propia Lara Fernández-Noriega a que dea as explicacións oportunas e asuma as responsabilidades que correspondan.