O deputado do BNG, Néstor Rego, rexistrou iniciativas no Congreso para reclamar a reforma integral das dúas pontes que permiten atravesar a vía férrea de ancho métrico –antiga FEVE– no concello do Vicedo, en Lugo.

As estruturas, situadas en Valdesuso e Sacido, presentan un avanzado estado de deterioración e deficiencias que pon en risco tanto o tráfico rodado como a integridade das persoas viandantes.

Durante a visita, Rego estivo acompañado polo portavoz municipal do BNG no Concello do Vicedo, Miguel Gómez; o responsable comarcal da formación nacionalista da Mariña, Antón Veiga, e militantes e simpatizantes da organización na localidade.

O deputado do BNG no Congreso alertou de que estas pontes “non cumpren as condicións mínimas de seguridade viaria, con plataformas estreitas, curvas perigosas e varandillas deterioradas ou directamente desaparecidas”. Por iso, reclamou ao Ministerio de Transportes ou a ADIF “a inmediata intervención para garantir a protección dos veciños”.

Ademais, o parlamentario chamou a atención sobre a ausencia total de beirarrúas ou calquera medida de protección para os peóns, o que asegura que agrava o risco destas infraestruturas. “É necesario reformar estas pontes cun proxecto integral que permita corrixir o trazado, ampliar a plataforma e garantir o paso seguro tanto de vehículos como de persoas”, sinalou.