Un buzo que realizaba traballos de mantemento nunha piscifactoría en Cervo, sufriu un accidente laboral de gravidade o pasado venres día 22. Os feitos ocorreron cando o pé dereito do profesional foi succionado por unha bomba de desaugue, feito que ocasionou a amputación do pé, segundo informa o Sindicato de Buceo. Segundo o mesmo sindicato, a bomba de achique causante da perda da extremidade do buzo, “foi arrincada por alguén da planta de maneira neglixente”.

Os feitos ocorreron ás 14:00 momento en que compañeiros do buzo deron aviso ao Centro Integrado de Atención ás Emerxencias (CIAE) do 112 Galicia. Mentres tanto, os compañeiros retiraron ao ferido de gravidade a quen lle fixeron un torniquete de emerxencia. Tamén foron alertados o GES de Cervo, a Garda Civil e o 061.

O pé dereito do buzo sufriu unha sección case total. O ferido foi enviado ao Hospital Público da Mariña, non sen antes ser atendido no lugar polo persoal médico ante as fortes dores que sufría.