As vítimas das gravacións durante as festas da Maruxaina, en Cervo en 2019, seguirán prestando declaración ante o xuíz do xulgado número un de Viveiro “ata finais de maio“. De momento tomouse declaración “a máis de 70 mulleres”, do máis do centenar delas que foron gravadas ouriñando, cuxas imaxes se subiron ás redes sociais e mesmo a páxinas porno.

A presidenta de Mulleres en Igualdade de Burela, que se persoa como acusación particular, María del Mar Fraga, confirmou que “a previsión é que ata finais de maio non se conclúa coa toma de declaración ás vítimas”.

Fraga constatou que “se está tardando un pouco máis polo tema das mulleres que se atopan fóra da comunidade (Galicia) e mesmo fóra do país, e iso leva tempo”. No entanto, lamenta a “lentitude” da xustiza, “que vai lentísima e se non os apuras un pouco ou te moves, como neste caso, queda a cousa no esquecemento”.

A activista mariñá confesou que ten “esperanza” de que nesta ocasión a investigación “siga adiante” e se dea co autor ou autores de ditas gravacións. Todo iso despois de que o mesmo xulgado de Viveiro arquivase a causa e agora se vexa obrigado a seguir instruíndo despois de que así llo ordenase a Audiencia Provincial de Lugo.

“Esperamos que sigan coas investigacións. Agora si segue adiante coas declaracións, e non podemos esperar outra cousa” que se conclúa coa investigación, sostén.