A edil de servizos sociais de Cervo, Pilar Armada, saíu ao paso das críticas do PSOE, que denunciou que “só 9 dos 32 usuarios” da residencia municipal de San Cibrao son do municipio. A concelleira afirma que hai “20 cervenses a día de hoxe” que teñen praza no centro e asegura que os socialistas están “instalados na mentira” e “xogan ao despiste” cunha actitude “irresponsable”.

PREZOS

Os socialistas lamentaron os “elevados” prezos do servizo, que contrastan coas “segundas pensións máis baixas do Estado”. Armada precisou que desde a súa área estanse a facer os trámites necesarios para que as persoas usuarias dependentes -que afrontan un maior custo- podan beneficiarse dunha axuda da Xunta de Galicia de libranzas vinculadas para residencias e centros de día, con importes que van desde os 300 aos 715 euros.