Os Brincos Musicais do Concello de Cervo arrIncaron este mércores cunha excelente acollida, superando os 30 nenos e nenas inscritos entre os dous grupos organizados por idades.

Esta nova proposta inclúese dentro do programa municipal de conciliación Brincos de Lecer, unha iniciativa pensada para ofrecer actividades educativas e lúdicas para os máis pequenos.

As sesións celébranse na Casa do Mar e están impartidas pola musicoterapeuta María Fuente García. O programa estrutúrase en dous grupos: un de estimulación temperá para nenos e nenas de 0 a 3 anos, e outro de iniciación musical dirixido a participantes de 4 a 7 anos.

Durante esta primeira xornada, os pequenos tiveron a oportunidade de experimentar e descubrir diferentes instrumentos musicais, explorar sons e ritmos e participar en xogos musicais adaptados ás súas idades, nun ambiente creativo e participativo.

A alcaldesa de Cervo, Dolores García Caramés, achegouse tamén ata a actividade para compartir uns intres cos nenos e nenas neste primeiro día, comprobando de primeira man o bo ambiente das sesións e o entusiasmo dos participantes, que gozaron moito da experiencia e destacou a gran resposta das familias a esta iniciativa, que “busca fomentar o desenvolvemento sensorial, a creatividade e o contacto coa música desde idades temperás, tendo en conta todos os beneficios que esta aporta en todos os sensos”.