Este mércores, as pistas de atletismo municipais de Cervo enchéronse de deporte, convivencia e solidariedade coa celebración da iniciativa “Corremos xuntos, chegamos xuntos”, organizada polo CEIP Península da Paz con motivo do Día Escolar da Paz.

A alcaldesa Dolores García Caramés, o concelleiro Adrián Arias e a edil Mali Méndez achegáronse ata as pistas para animar ás persoas participantes e compartir esta fermosa xornada.

 Máis de 300 participantes dos centros educativos do municipio –Ceip Península da Paz, Ceip de Cervo e IES Marqués de Sargadelos- e de diferentes entidades e colectivos —como Saúde Mental A Mariña, Aspanane ou o Centro de Día Residencia— tomaron parte nun evento solidario no que tamén se recolleron alimentos para a Cruz Roja e o banco de alimentos.

 Carreiras adaptadas, lectura de manifestos pola paz, música, merenda e moito compañeirismo fixeron desta xornada un exemplo de inclusión, respecto e solidariedade a través do deporte.

O Concello enviou os seus parabén ao CEIP Península da Paz pola organización, ás entidades colaboradoras, ao voluntariado e a todas as persoas implicadas por facer posible unha actividade tan especial e chea de valores.