A alcaldesa de Cervo, Dolores García Caramés mantivo un encontro coas representantes das ANPAS dos centros educativos do municipio. Durante a reunión abordáronse diversos asuntos relacionados co funcionamento dos centros e fíxose entrega dun cheque de 1.250 euros a cada asociación, co obxectivo de apoiar as actividades que organizan ao longo do curso.

García Caramés puxo en valor o traballo constante destes colectivos, destacando que con esta achega “pretendemos contribuír ao desenvolvemento de actividades lúdicas, educativas e culturais que enriquecen o proceso formativo do alumnado e que axudan a fortalecer unha contorna escolar máis aberta, participativa e de calidade”.

A alcaldesa engadiu que esta axuda tamén busca facilitar o funcionamento interno das asociacións, ofrecéndolles un respaldo económico que lles permita facer fronte aos seus gastos habituais. Esta subvención municipal reflicte o noso compromiso coa educación, que é a base do futuro das novas xeracións, concluíu.