Un incendio forestal rexistrado esta madrugada no municipio de Cervo obrigou a desaloxar as vivendas dunha urbanización e a evacuar a uns 40 veciños, segundo informou o CIAE 112 Galicia.

O incendio iniciouse na madrugada deste mércores, sobre as 4.00 horas, no lugar de Río Covo da parroquia de Lieiro e, segundo informou a Emerxencias a Garda Civil, a proximidade das casas levou ao desaloxo da urbanización e de varias vivendas próximas, da zona da Pedrosa.

A Consellería do Medio Rural informou de que, segundo as últimas estimacións, o lume afectou a unhas 5 ou 6 hectáreas e permanece activo, aínda que “a súa evolución é favorable”. Para a súa extinción mobilizáronse 3 axentes, 7 brigadas, 7 motobombas e un técnico.

O 112 explicou que, en total, tiveron que trasladarse uns 40 veciños de 14 vivendas e, por precaución, tamén se informou á residencia de maiores de San Ciprián, para que se confinase.

O CIAE 112 informou de que, tras varias horas de traballo dos equipos de extinción, o lume está practicamente controlado e a maior parte das persoas desaloxadas puideron regresar aos seus domicilios, excepto 8 veciños de dúas vivendas da Pedrosa.