O Concello de Cervo será escenario este verán de tres campus deportivos organizados pola Federación Galega de Natación (FEGAN), en colaboración co propio Concello. As actividades desenvolveranse na piscina municipal e estarán dirixidas a nenos e nenas federados interesados en mellorar as súas habilidades nas disciplinas de natación, natación artística e waterpolo.

O calendario dos campus será o seguinte:

• Campus de waterpolo: do 30 de xuño ao 5 de xullo

• Campus de natación: do 7 ao 12 de xullo

• Campus de natación artística: do 14 ao 19 de xullo

O campus de natación artística está destinado a rapaces e rapazas nados nos anos 2010, 2011, 2012 e 2013, mentres que os campus de natación e waterpolo están dirixidos aos nados entre 2011 e 2014.

A presentación oficial contou coa presenza do presidente da Federación Galega de Natación, da alcaldesa de Cervo, e do edil de Deportes.

Durante a presentación dos campus, na que estiveron presentes a rexedora, Dolores García Caramés, o edil de Deportes, David Rodríguez, e o presidente da FEGAN, Juan Carlos Brión, a alcaldesa destacou que “para Cervo é unha honra colaborar coa Federación Galega de Natación na organización destes campus que achegan deporte, formación e convivencia aos máis pequenos”

Así, engadiu, a piscina municipal converterase nun punto de encontro para mozos e mozas de toda Galicia que comparten paixón polas disciplinas acuáticas, todo un orgullo para nós.

Desde o Concello –apuntou- traballamos todo o ano para fomentar o deporte de base e para poñer en valor as nosas instalacións deportivas, que cada vez acollen máis eventos de nivel autonómico. Este tipo de iniciativas contribúen ademais á dinamización social e económica do noso municipio durante os meses de verán.

As persoas interesadas poden obter máis información e realizar a súa inscrición a través da páxina web da FEGAN: www.fegan.org.