O Concello de Cervo puxo en marcha de novo este verán os programas “Cervo a carón do voluntariado VII” -dirixido á mocidade de entre 16 e 30 anos- e Voluntariado Miúdo IV–dirixido á mocidade de entre 12 e 15 anos-.

As iniciativas de acción voluntaria, tal e como apuntou a alcaldesa, Dolores García Caramés, tiveron unha gran resposta entre a mocidade do Concello. Así, foron 11 as rapazas que se sumaron a este proxecto amosando o seu compromiso activo coa sociedade a través do desenvolvemento cultural e social.

A alcaldesa, mantivo un encontro con elas ao remate da súa xornada en Cervo Concilia, o programa referente de conciliación do Concello, no que participan máis de 150 crianzas, e que se prolongará ata o 10 de setembro, facendo coincidir a súa clausura co inicio do curso escolar, para cubrir así por completo a franxa de descanso estival das crianzas.

Na reunión, a rexedora quixo felicitar a todas as voluntarias pola súa implicación “dedicando o seu tempo, a súa enerxía e o seu entusiasmo sen agardar nada a cambio”, o seu traballo foi fundamental tanto no Cervo Concilia, como nas Noites Alternativas de Verán, nas que tamén colaboraron activamente, “levando consigo a satisfacción de axudar dando o mellor de si mesmos, ao tempo que pasaron un verán entretido e entre amigos”.