O próximo mércores, día 18 de novembro, a Asociación de Axuda ao Enfermo Mental A Mariña inaugurará -10.00 horas- a súa exposición de artesanía da Aula do Mar inclusiva, a primeira destas características na contorna e en Galicia. A mostra poderase ver na casa da cultura de San Cibrao (Cervo), durante un mes, dende o 18 de novembro ata o 18 de decembro.
A Aula do Mar A Mariña é un proxecto de integración social para as persoas con enfermidade mental crónica, na cal se pon en valor o patrimonio costeiro, os recursos patrimoniais e ambientais da zona da Mariña-Ortegal. Este proxecto desenvólvese na unidade residencial de Cervo e ten unha duración de tres anos pero que tamén será desenvolvido nos Centros de Rehabilitación Psicosocial e Laboral que a Asociación de Axuda ao Enfermo Mental A Mariña dispón nas localidades de Burela e Ribadeo, sendo así un aula itinerante.
“Os participantes gozan de maneira activa nas actividades propostas aproveitando as potencialidades e características da nosa costa Mariña-Ortegal. A Aula do Mar é un espazo de comunicación transversal ante o sector pesqueiro e os demais colectivos en risco de exclusión social”, expoñen desde a asociación, que concreta que se contemplan cinco actividades xerais: terapia-mar, crea-mar, coida-mar, explora-mar e “o camiño e o mar”.
As pezas de artesanía que se poderán contemplar na exposición son aquelas realizadas nos talleres da actividade denominada “Crea-mar” durante este ano 2020. Elaboráronse dende libretas pintadas á man, lápises decorados, xabóns artesanais ou pezas de cerámica, todo con motivos mariñeiros e do mar.
VISIBILIZACIÓN PARA O COLECTIVO
“Toda participación activa da entidade nese tipo de actividades axudan a dar maior visibilización ao colectivo á vez que fixo que aumentase e influíse moi positivamente na autoestima dos nosos usuarios, sentíndose moi orgullosos xa que está a ser unha experiencia moi pracenteira para todos eles”, resalta a asociación.
Este proxecto concedeuse ó abeiro das estratexias de desenvolvemento local participativo (EDLP), aprobada pola Consellería do Mar ó Grupo de Acción Local do Sector Pesqueiro (GALP) a Mariña – Ortegal no marco da FEMP.