InicioEconomíaO comité acusa a Alcoa de "dar as costas" a San Cibrao...

O comité acusa a Alcoa de “dar as costas” a San Cibrao tras rexeitar manter o cambio de cubas

Os sindicatos ven a negativa "unha falta de compromiso" por parte da empresa, que cualifica de "crítica a situación de aluminio", e urxen ao Goberno a aprobar o estatuto

Publicada o

- Advertisement -

Alcoa cualifica a situación da planta de aluminio de San Cibrao de “crítica” e rexeita retomar as tarefas de cambio das cubas de electrolise que cheguen á fin da súa vida útil. A paralización destas labores, que permiten reactivar a maquinaria para manter a produción, derivou na presentación de Expedientes de Regulación Temporal de Emprego (Erte) en Reymogasa e Cyrgasa, con 30 e 13 traballadores afectados, respectivamente.

A compañía negouse a reconsiderar a súa posición sobre un recorte que insiste en cualificar como “temporal“. Nunha reunión mantida entre o director de Alcoa España, Álvaro Dorado, e o comité de empresa do complexo sancibrense, Dorado aludiu aos “problemas estruturais do marco enerxético” e á “sobrecapacidade da planta” e “aos baixos prezos do aluminio no mercado, cunha caída de case o 20% no que vai de ano”, para xustificar a medida.

Malia que o prezo da enerxía caeu, a causa da pandemia, ata os 27,2 euros/megavatio/hora no pasado mes de marzo, a multinacional reitera que a produción do aluminio en España é “inviable” sen un abaratamento da enerxía eléctrica e cuantifica o prezo neto do megavatio/hora en alomenos 47 euros coas condicións do estatuto das empresas electrointensivas que o Goberno ten sen aprobar.

Neste sentido, a multinacional anunciou que prevé unhas perdas de 50 millóns de euros na planta de aluminio para o exercicio 2020, sen concretar que cantidades prevé no tocante á produción de alúmina.

ALCOA ELUDE INVESTIMENTOS MALIA UN “COMPROMISO” DA XUNTA PARA COFINANCIAR O GAS

Os sindicatos desmarcáronse da postura da multinacional, a quen acusaron de “dar as costas” a San Cibrao. A negativa a continuar coas tarefas de rebrascaxe, que condena á fábrica a perder maquinaria e suporá recortes no emprego en alomenos un par de empresas auxiliares, “parécenos unha falta de compromiso con todos os traballadores, tanto do persoal, como temporeiros ou contratistas”.

O comité referiuse ao compromiso adoptado poa Xunta de Galicia, que se comprometeu a apoiar o investimento da implantación do gas en aluminio cun 30% do custo total, “moito por riba do aforro conseguido coa medida anunciada”. Preguntadas por este medio sobre a previsión de investimentos estratéxicos, que os obreiros ven necesarios para a continuidade a medio prazo do complexo industrial, fontes de Alcoa non quixeron pronunciarse ao respecto.

OS OBREIROS ACUSAN AO EXECUTIVO CENTRAL DE “DESPREZAR” A INDUSTRIA

“Nin sequera este compromiso revertiu a decisión” de Alcoa, lamentan os sindicatos, que criticaron “o desprezo” do Goberno central á industria “ao non acometer ningunha medida que regule o prezo enerxético do país”. Neste sentido, o comité reiterou a súa solicitude para que se convoque a mesa multilateral pulo futuro da planta, “lembrando que a aprobación dunha nova poxa de interrompibilidade ou as axudas ás compensacións por emisións indirectas de CO2 pódense facer sen o estatuto”.

Os sindicatos pedirán audiencia, informan, ao presidente da Xunta de Galicia para pedirlle que vincule a axuda do 30% ao mantemento de toda a actividade produtiva, tamén a rebrascaxe de cubas.

Os sindicatos, finalmente, piden aos representantes políticos que amosen “o mesmo comrpomiso” dos traballadores e da comarca da Mariña, “para sacar a fábrica adiante cando se declarou esencial“. Neste sentido, lembran que se aprobaron iniciativas por unanimidade no Congreso para regular o prezo da electricidade aos consumidores electrointensivos.

ÚLTIMAS

As queixas pola comida na residencia da Pontenova motivo de reunión do BNG cos usuarios

Ante as queixas xurdidas novamente na vivenda comunitaria de A Pontenova polo servizo de...

ACIAFoz sorteará unha cesta entre os clientes máis cafeteiros de 10 locais focegos

AciaFozCCA sorteará unha cesta entre os clientes máis cafeteiros de 10 locais hostaleiros. Esta...

A Garda Civil investiga a tres persoas por deliti de ameazas e inxurias

A Garda Civil investiga na localidade lucense da Pontenova os tres presuntos autores de...

Burela dá por rematadas as obras de mellora no abastecemento da rúa Lamestra

O Concello de Burela informa do remate das obras de ampliación e mellora da...