O Consello da Xunta acordou este luns autorizar a licitación das obras de protección contra a contaminación acústica na LU-862, no seu treito urbano polo concello de Viveiro. O Goberno galego destinará un investimento de preto de 700.000 euros a este contrato, que ten como obxectivo mellorar as características de dous tramos da vía que suman 1,5 quilómetros de lonxitude. A actuación busca minorar o ruído ambiental provocado polo tráfico nunha zona que soporta unha intensidade media de máis de 13.300 vehículos diarios, cun prazo de execución previsto de doce meses.
De xeito paralelo, a Xunta deu conta da próxima exposición pública do estudo informativo e de impacto ambiental da variante de Viveiro. Esta infraestrutura preténdese que mellore as comunicacións no principal núcleo da Mariña lucense, estimando que o 60 % do tráfico actual se desprace cara á futura variante. Cómpre lembrar que en Viveiro o Partido Popular acadou a Alcaldía tras unha moción de censura o pasado mes de febreiro de 2025.