O Ministerio de Industria convocou para o 21 de marzo, xoves, unha nova reunión da mesa de seguimento de Alcoa San Cibrao. Diso informou o Goberno despois de que o comité de empresa de Alcoa volvese demandar por terceira vez ao Executivo central que se convoque de forma urxente este encontro para buscar “unha saída definitiva” á fábrica da Mariña. O encontro prevese na sede do Ministerio, en Madrid, na mañá do 21.
O Ministerio destaca que “se segue traballando con empresa e traballadores para abordar alternativas, demostrando o seu compromiso cun sector estratéxico como o aluminio en Galicia e España”.
Previamente a coñecerse esta data, o presidente do comité de Alcoa, José Antonio Zan, criticou que este encontro entre administracións, empresa e representantes dos traballadores “xa leva tres semanas de atraso” desde a data comprometida da que será a décimo sétima reunión de seguimento. Así, Zan recrimina que “Alcoa cada vez manda unhas mensaxes máis claras de que nin está nin se lle espera, nin conta con estar no futuro”.
Precisamente, a Xunta tamén enviara esta mesma mañá un correo ao Ministerio con tres posibles datas para celebrar esta reunión a próxima semana, despois de non obter resposta nos últimos días. Finalmente, o Goberno central contestou coa data do 21 de marzo.
Todo iso mentres Alcoa prevé ter esta semana un total de 16 cubas en funcionamento no marco do proceso de rearranque gradual da planta, que levou a que a fábrica volvese a producir aluminio primario despois de dous anos. O acordo asinado cos traballadores pasa por ter 32 cubas a 1 de abril e continuar coa ampliación progresiva ata o pleno funcionamento en outubro de 2025.
Así mesmo, a compañía anunciou a pasada semana un acordo para a compra por máis de 2.000 millóns de euros en accións da australiana Alumina Limited, propietaria do 40% da refinaría de San Cibrao. Precisamente, o comité de empresa tamén pide unha reunión de seguimento da fábrica de alúmina, que leva desde novembro sen celebrarse, a pesar de que a compañía “se comprometeu” a realizala mensualmente.