A Pomba do Arco organiza o vindeiro martes en Foz unha mesa redonda sobre a historia da resistencia antifranquista na Mariña. O coloquio reunirá partiparán o guerrilleiro berciano Francisco Martínez “Quico”, o único membro vivo da Federación de Guerrillas de Galiza e León, e Fernanda Cedrón, neta de Luís Trigo Chao ” O Gardarríos”, asasinado en 1948 en Lourenzá. Na palestra tamén intervirá Odette Martínez, directora do centro da memoria da Universidade de Montpellier.

O guerrilleiro, que con 93 anos viaxará ata Foz desde Alacante, onde reside, compartiu a loita con algúns dos nomes máis coñecidos da resistencia clandestina ao franquismo como Manuel Girón, chegando a actuar como comisario político da II agrupación de guerrillas que operaba na área de Ourense, dos Ancares e do Bierzo. 

A intervención de Fernanda Cedrón xirará en torno as lembranzas mantidas na memoria familiar da loita levada a cabo por seu avó e da conformación da guerrilla na zona con importantes puntos de apoio en Viveiro, Ourol, Muras pero tamén Mondoñedo, Lourenzá, O Valadouro e Foz.

A asociación cultural presentou a palestra como nunha “oportunidade se cadra única para coñecer de primeira man a historia da guerrilla antifranquista” e excepcionalidade de reunir na mesma mesa aos tres participantes, residentes -no caso de Fernanda Cedrón, parte do ano- fóra de Galicia. A mesa redonda comezará ás 20:00 horas na Casa da Cultura.