O comité de empresa da planta de Cervo ve “bastante feo” a “falta de comunicación” por parte dos novos responsables de Alcoa Inespal, aínda que son uns cambios “xa esperados” tendo en conta que “facía xa case un ano que se xubilou o antecesor”.

Así se pronuncia, en declaracións aos medios de comunicación, o presidente do comité da Mariña, José Antonio Zan, quen afirmou estar “a esperar” por unha reunión cos novos xefes para que “expliquen que proxecto de futuro teñen, que visión teñen”.

A ausencia de comunicación, “horrible” para Zan, mostra ao seu xuízo a “falta de interese por parte da dirección en levar ben cos traballadores”, e a súa vontade de “seguir penalizándoos por loitar por unha fábrica na que crían” e que o persoal demostrou ” que podía ser viable”.

“Asinamos un acordo para ter todas as cubas funcionando. O día 7 estarán todas. Sempre cremos en que se podía facer e tamén cremos que deberiamos ter xa o forno de cocción funcionando”, advertiu o representante dos traballadores.

Así mesmo, opinou que o Goberno e a Xunta deberían estar “a apoiar e non pondo paus nas rodas”, algo que exempificou “co tema dos parques” eólicos: “O único que fixo o Goberno é pór paus nas rodas e non buscar unha solución a unha enerxía barata e estable”, concluíu.