Unhas cincocentas persoas acudiron este xoves á concentración diante do Centro de Saúde de Viveiro para mostrar o seu rexeitamento diante da desfeita sanitaria que está a sufrir a localidade e a comarca en xeral.

Concretamente, este xoves no centro de Saúde de Viveiro estaban traballando soamente cinco dos once médicos que formar o persoal de medicina de familia. O persoal de enfermaría en vacacións tampouco está a ser substituído, e mentres que a Plataforma Sanitaria da Mariña denuncia que o servizo de pediatría traballa ao cincuenta por cen desde hai anos.

Sinalan que o centro de saúde está a absorber os déficits sanitarios dos centros de saúde de Ourol e o Vicedo, con médicos de familia algúns días. “Polo tanto a atención sanitaria non está garantida e o persoal está a ser sometido a sobrecargas e presións asistenciais que poñen en risco a súa saúde”.

Desde a Plataforma Sanitaria da Mariña “esiximos á consellería que se poña a traballar nun plan de reforma da Atención Primaria e se deixe de parchear, porque o único que fixo o PP durante dezaseis anos de goberno foi destrozar a sanidade pública” sinalan. Lembran que a primeira acción do goberno da Xunta foi a suspensión do ambicioso plan de mellora de Atención Primaria que estaba en marcha cando accederon ao goberno.

Desde o colectivo sanitario sinalan que o resto da comarca tamén está en situación moi crítica co sistema a piques de derrubarse, “pois non está garantida a asistencia sanitaria no nivel máis básico de saúde, o nivel que sostén o sistema público de sanidade”.